لاہور: گوادر کے طلبا نے وزیراعلیٰ پنجاب شہباز شریف کے سامنے اپنے تحفظات کا اظہار کرتے ہوئے کہا ہے کہ پاک چین اقتصادی راہداری منصوبہ گوادر میں بن رہا ہے اور ترقی لاہور میں ہو رہی ہے۔

وزیراعلیٰ پنجاب شہباز شریف نے گوادر سے تعلق رکھنے والے طلبا کے اعزاز میں دیے گئے ظہرانے میں شرکت کی تو طلبا سی پیک سے بلوچستان کو محروم رکھنے پر پھٹ پڑے اور وزیراعلیٰ پنجاب سے کہا کہ سی پیک کا سن سن کر تھک چکے ہیں، منصوبہ گوادر میں بن رہا ہے اور ترقی لاہور میں ہو رہی ہے۔

طلبا نے کہا کہ ہمارے پاس پینے کے لیے نہ تو صاف پانی میسر ہے اور نہ ہی کپڑے استری کرنے کے لیے بجلی لیکن جب سیاست دان گوادر کا دورہ کرتے ہیں تو لوڈ شیڈنگ ختم ہو جاتی ہے۔

طلبا نے کہا کہ چینی زبان سیکھنے کے لیے طالب علموں کو بھی لاہور سے بھیجا جاتا ہے، بلوچستان سے نہیں۔

وزیر اعلیٰ شہباز شریف نے نوجوانوں کے جذبات کو ٹھنڈا کرنے کی کوشش کی لیکن ان کے سوالات کا معقول جواب نہ سکے۔

Advertisements