2011 ءِ روچ اتنت کہ اوتاک ءِ تہا یک کنڈے ءَ کسانین جگ است ات . کہ ہمے جگ ءِ تہہ ءَ کدی شہید ماما مہندو وپتگ ات ءُ کدی دگہ مہروانین سنگت ہمے جگ ءِ براہ اتنت بلے اے وہد ءَ ہمے جگ ءِ تہہ ءَ سہ ورنا قید ات انت .کہ آوانی پاد کبل جنوک اتنت ءُ اے سہیں ورنا جتا جتائیں جنجالانی سوب ءَ بندیگ کنگ بوتگ اتنت یک ورناہے نیام تائیں بالاد پتنیں سینگ دراجیں گلگ ءُ گٹ ءَ ہار ءِ وڑیں بندیک ءُ دست ءَ تلاہ رنگیں گھڑی ءُ مندریک ءُ شوقیں جراں گوں اے ورنا شہزادگ ءِ وڑا ات. کوہ ءِ بزگی ءُ خواری ءَ ابید ہم اے ورنا چو شار ءِ شوقی ایں ورناہانی وڑ ءَ ات. قبائلی چاگرد ءَ رستگیں اے ورنا وتی دنیا ءَ مست ءُ گنوک ات ایشی ءِ دل ءَ نہ کدی وطن ءِ درد مارت ءُ نہ کہ کدی ایشی ءَ آجوئی ءِ مہروانین پری ءَ گندگ لوٹ ات کوریاک ہرنائی ءَ نندوکیں اے ورنا باز رند ءَ آجوئی ءِ پڑ ءَ درکپتگیں سرمچاراں گوں دیم پہ دیم بوت بلے آئی ءَ کدی اے سوچ نیاتک کہ آ وتی ڈیھ ءَ چہ رستراں پاک بکنت آئی مدام وتی دنیا ءَ آباد کرتگ ات مالداری ءُ زند ءِ نوک نوکیں رنگاں گوں وترا ہمگرنچ کرتگ ات سال 2011 ءَ اے ورنا ءَ اوتاک ءَ قید کنگ بوت کہ ایشی ءِ سرا دزی ءِ ڈو لگیتگ ات کہ ایشی ءَ دزی کرتگ آ منگ ءَ نہ ات اوتاک ءَ قید ات اے ورنا کہ ایشی ءَ ما شہید امام بخش پنام سُری ءِ نام ءَ پجہ کاراں. شہید سُری ءِ پس ءِ نام بارہ خان ات گوں مری قبیلہ ءِ ٹک چلگری ءَ تعلق دار اتنت. ءُ ہمے علاقہ ءَ نندوک اتنت کہ مدام ایش بلوچ سرمچاراں گوں ڈک وارت انت بلے آئی دل کدی جہہ نہ جت کہ آ آجوئی ءِ راہ بئیت. ہمے ورنا اوتاک ءِ کنجے ءَ دو دگہ قیدیاں گوں بند ات. قید ءِ زند ءُ گلامی یک پیم انت. اے قید ءِ زند ءَ چہ آئی ءَ درکپگ ءِ فیصلہ کرتگ ات آ مدام جگ ءِ دپ ءَ نندوک تچگ ءِ ہیالاں گوں سر ءُ چیر ات آ یاگی ات آئی ءَ اے قید ءَ درکپگ ءِ فیصلہ ءَ زرتگ ات ہمے قید ءِ زند ءَ آئی ءَ جتائیں تب ءُ جتائیں فکر ءُ جتائیں ھیال داروکیں مردماں گوں دیم پہ دیم بوتگ ات آئی ءَ شہید امیرالملک ءِ گپ اشکیتگ اتاں آئی ءَ شہید ماما مہندو ءِ تب ءُ مزاج دیستگ ات آئی ءَ شہید حق نواز ءُ شہید درویش ءُ شہید رشید ءُ شہید ملک ءُ عرفان سرور شہید لال خان ءُ دومی سنگتاں دیستگ ات آ اوتاک ءَ ات بلے قید ات آئی ءِ زانت سما ءَ اے گپ کنڈے ءَ جاگہ کرتگ ات کہ آ اوں جہد ءَ ہوار بہ بیت آئی ءَ اے قید ءِ زند ءَ ماریتگ ات. یک روچے کہ سہب میزان میزان ءَ برز بوہان ات شہید لال خان قیدیاں چکر ءَ برگ ءَ ات. سات ئے ءَ رند تپنگ ءِ توار بوت کہ قیدی تتکگ انت. شہید لال خان پنام چاچا کہ وتی زند ہمے کوہانی گر ءُ گٹاں گوازینتگ ات امام بخش ءُ دومی قیدیاں رسینت کرت رسینگ کجا شہید لال خان ءِ چم نزور اتنت کمیں شہید چاچا ءِ چماں اندیم بوت انت آہاں ءَ چاچا ءِ چمانی نزوری ءِ فائدگ چست کرتگ ات جستگ اتنت. چیزے روچ ءَ رند امام بخش وتی پس ءِ پجی ءَ اوتاک ءَ نندوک ات آئی ءَ قید ءَ گڈ کنگ ءِ معافی لوٹگ ءَ آتکگ ات. رند ءَ آ اوتاک ءَ سنگتاں گوں ہوار ات. آئی ءَ اوتاک ءِ سنگتاں نزدیکی ءَ دیست آہانی مہر آہانی سوچ ءَ تپاست سنگتانی توک ءَ نندگ ءُ زند گوازینگ ءَ چہ آئی توک ءَ بازیں بدلی آتکگ ات. بلے آئی یاگی ایں تب ہما وڑ ءَ است ءُ سلامت ات آ چٹکیں ءُ چالاکیں ورنایے ات آئی تہہ ءَ یک یاگی ایں کارستے مدام سر کش ات ءُ آئی ءَ لاچار کرت ہمے یاگی ایں کارست سُری ات کہ امام بخش ءَ چہ آئی ءَ پُلیں سُری جوڑ کرت. 2012 ءَ تاں آ اوتاک ءِ سنگتانی کر ءَ وتی رو ءُ آ برجاہ داشتگ ات بلے آئی ءِ یاگی ایں کارست ءَ اوتاک ءِ پابندیں زند نہ ساچت. آئی ءَ دانکہ اوتاک ءِ سنگتی ءَ وتی دل ءَ جاگہ ءَ نہ داتگ ات بلکنا وتی آزاتیں تب ءَ گوں کدی سرمچاری زند ءَ گوں بوت پدا واتر وتی زند ءَ شت دانکہ کہ آئی یاگی ایں کارست سُری سرپد بوت کہ انسان ءِ جند ءِ آزادی ہما وہد ءَ بامقصد بیت وختیکہ آ وتی ڈیھ ءِ وت واجہ بہ بیت اے ھیال ءَ امام بخش ءِ یاگی ایں کارست سُری ءَ سرمچاری زند ءَ بکشات. یاگی ایں سُری نون سرپد بوتگ ات کہ آ دانکہ وتی ڈیھ ءَ آزات نہ کنت آرام ءَ نہ نندیت ہما سُری کہ سر یلہ ات نون اوتاک ءِ پابندی ءَ وتی گٹ ءَ بستگ ات آئی سوچ پہک ءَ بدل بوتگ ات آ یک ایماندار مخلص ءُ بہادریں سرمچارے دروشم ءَ اوتاک ءَ پتریتگ ات من اوتاک ءَ ننداں آئی ءَ کلاشنکوف بڈ ءَ کرتگ ات آئی ہمے پاک ءُ پلگاریں فکر ءَ زرتگ ات وتی سر یلہ سُری ءَ آزادی ءِ راہ ءَ قربان بوہگ ءِ سانکل جتگ ات امام بخش ءِ توک ءِ کارست سُری نون یک بہادریں سرمچارے دروشم ءَ پدر بوہان ات. آئی ءَ 2012 جولائی ءِ ماہ ءَ اوتاک ءِ تپنگ بڈ ءَ کرتگ ات 2012 ءَ بگر داں وتی شہادت ءِ روچ ءَ آئی کرد چو پاکیں قرآن ءَ ات آئی ءَ وتی گوست ءَ بے ھال نہ کرتگ ات بلے وتی گوست ءَ بے مقصد سرپد بوت آئی ءَ پہ ڈیھ ءِ آجوئی ءَ ہرچ کجام تپنگ کہ آئی ءَ دیگ بوت آ وتی دلیری ءُ بہادری ءَ گوں کوپگ ءَ کرت آئی خواری کشیں تب آئی قربان بوہگ ءِ جوزہ آئی کرد ءَ تہاریں شپاں چو ماہکان ءَ گروشک دینت آ امام بخش ءَ چہ سُری جوڑ بوتگ ات. اوتاک ءِ ہرچ گشت ءِ روژنائیں چراگ ات کدی چم کپتین انت آئی بڈ ءَ سکیل انت دژمن ءِ سرا ارش کنگ ءَ انت کدی آئی کوپگ ءَ راکٹ انت کہ آ دژمن ءَ یک کش ءَ رد پہ رد جنئگ ءَ انت کدی آئی بڈ ءَ دو تپنگ انت کہ آ وتی سنگتانی بوج ءَ کم کنگ ءَ زرتگ. ہرچ وہد ءَ چم کپنت آ تپنگ ءَ ساپ کنگ ءَ انت یا یک نہ یک کارے ءَ دز گلائش انت آئی ءَ باز کمیں وہد ءِ تہہ ءَ وتی بستار ءَ سنگتانی تہا جوڑ کرت سُری ءِ کمی ہرچ جاور ءَ مارگ بیت آئی ءَ اے چار سال ءِ تہہ ءَ ہرچ جنگی گشت ءَ اولی ایں رد ءَ اوشتوک ات کس ءَ گمان اوں نہ کرت کہ اے ہما سُری انت کہ ایشی ءَ دزی کرتگ. نوں آئی کرد انچش راجی بوتگ ات کہ آ وتی علاقہ ءَ چہ درکپتگ ات آئی ءَ کلیں بلوچستان ءَ وتی بگل ءَ کرتگ ات ءُ ہرچ علاقہ ءُ ہند ءَ وتی پجار کرتگ ات. آئی وتی زند ءَ بلوچ راج ءِ نام ءَ کرتگ ات آئی ءَ باز کمیں وہد ءِ تہہ ءَ جنگی رپک ءُ رہاں سرپد بوتگ ات ءُ جنگی گشت ءِ اول رد ءِ وطن ءِ دیمپانانی تہہ ءَ وتی بستار جوڑ کرتگ ہما روچ ءَ رند آ ہر گشت ءَ سکیل ءُ راکٹ کوپگ ءَ ات ڈیھ ءِ گر ءُ گٹاں نپس گراں ءَ شت آئی ائید ڈیھ ءِ سینگ ءَ کپان اتنت آ روان انت دانکہ بولان ءَ 2013 ءَ گشت ءَ دژمن ءِ سرا ارش بیت دژمن سک باز تاوان وارت. ڈگار تین ءُ تاپگ انت سُری ءُ آئی ہمراہ دژمن ءِ سر ءَ ارش کن انت دژمن تاوان وارت. دژمن ءِ بالی گھراب ژپگ ءَ سر بنت سُری وتی ہمراہانی پجی ءَ کوہ ءَ چہ ایر کپتگ انت میدان ءَ گام جنان انت ٹاک نیم روچ انت روچ آس شانگ ءَ انت ڈگار تین ءُ تاپگ انت بلے ڈیھ ءِ مہروان ساہ دلدست ءَ ایر کرتگ انت روان انت دژمن ءِ بالی گھرابانی تیر گواری انت پٹ ءُ میدان ءَ بے وسی ءُ لاچاری انت نہ کہ سنگے است کہ اڈ بگیت گونڈوکیں ھشکیں جِر ءُ بوچانی تہا چیر دیاں ءَ روان انت شہید سُری ءُ شہید لال گل رمبان انت بالی گھرابانی یک شل ءَ تیر گواری انت شہید سُری بڈ ءَ راکٹ انت کہ آ وتی راکٹ ءِ گولہ پیسر دژمن ءِ سر ءَ جتگ ات دگہ گولہ ءِ راکٹ ءَ مان کنت راکٹ ءَ پیسر تیر ءَ گڈیتگ راکٹ کار نہ کنت شہید سُری رمبان انت کہ یک تیر ءِ پہلونک ءَ لگیت آ ٹپی بیت ہما جاگہ ءَ دیم ءَ جزئت نہ کنت شہید لال گل ہم تیر وارت ءُ آہانی پجی ءَ دگہ بازیں سرمچار ٹپی بنت بلے آ کلانی ھالت ھراب بیت بلے امام بخش سُری ءُ لال گل ءِ جاور ءَ چہ شرتر بنت جنگ جزان کنت کل ٹپی انت وتی ٹپی ایں سنگتاں کوپگ دیاں ءَ کشان کن انت دانکہ میدان ءَ چہ درکپنت.لال گل شہید بوتگ شہید سُری دانکہ سلامت انت ساہ گپت نہ کنت بے وسی ءُ لاچاری انت ھون دارگ نہ بیت آئی ٹپی ایں ہمراہ یے لنکک ءَ گوں آئی ٹپ ءِ ھون ءَ دارگ ءِ بے سوبیں کوشش ءِ کنت دم کن انت بلے ھون دارگ نہ بیت ہرچ دارو درمان کہ است ات آ جنگ ءِ بہر بوتگ انت شہید سُری دل ءَ ڈڈ انت بلے تیر ءَ وتی کار کرتگ ات کرار کرار ءَ شہید سُری ءِ ساہ روان کنت آ روک روک ءَ آزمان ءَ چاریت وتی سنگتانی بے وسی ءُ لاچاری ءِ داستان ءَ ھدا ءِ درگہ ءَ پیش کنت من وتی ماتیں گلزمین ءِ حق داتگاں مات وتی شیراں پہل کن ئے من پہ ڈیھ ءِ ننگ ءَ مرتگاں ماتیں بلوچستان تئی آس ءُ انگر ءُ چو تین ءَ تپتگیں ڈگار پمن چو سارتیں سمین انت من وتی سارتیں ڈیھ ءَ پہ مرگ آں من وشاں کہ من وتی ڈیھ ءَ آزات کنگ ءِ راہ ءَ قربان بوہگ آں آ کرار کرار ءَ وتی دپ سرینیت آ روک روک آزمان ءَ چاراں ءَ پہ مدامی 16 اگست 2016 ءَ مئے چماں اندیم بیت. شہید سُری ءُ شہید لال گل ءِ جونان سنگت کوہ ءِ گرو کن انت دگہ شپ ءَ کایاں سنبھالان اش. سنگت گوں پرشتگیں دل ءَ بلے مھکمیں جزم ءَ گوں ٹپی ایں جان آں گوں روان بنت دژمن کئیت ءُ شہیدانی لاش ءَ کش ایت ءُ بارت چنت روچ وتی نادراہ جاہ ایر کنت رند ءَ لس مھلوک ءِ دست ءَ دیگ بنت ءُ شہید سری گوں دومی شہیداں ہوار شہدائے بلوچستان قبرستان ءَ جاہ ءُ جل کنگ بیت لال ایں امام بخش گوں یاگی ایں سری ءَ ہوار مارا چہ مدامی جتا بیت بلے آئی ءَ وتی بہادری جوش ءُ جوزہ ءِ داستان ءَ وتی پدریچ ءِ خاترہ یل دنت دانکہ پدریچ وتی نرمزاریں سرمچار ءِ کرد ءِ رند گیری ءَ کنان ءَ جہد آجوئی ءِ ہمراہ بنت چوشیں نرمزاریں سرمچارانی کرد راج دپتر ءِ تاکاں داں ابد مانیت.

Advertisements